試左九龍城新開冇幾耐嘅「四哥火鍋」，頂左以前合興火鍋個位黎做，枱凳電爐都用返以前嘅，店舖裝修同以前冇咩唔同。老實講，入去已略嫌殘舊，陰陰暗暗，坐得唔舒服。咁啱冇客又冇電視機，店員企晒晌枱隔離望實，不時問啲嘢食點，加唔加野，氣氛堅古怪。
本地手切牛肉係唔錯嘅，牛味夠亦嫩滑；安格斯都 OK 但牛味較淡身冇咩特別；黑豚肉幾好味係百幾蚊貴左啲囉。魚同魷魚都唔算新鮮，明白黑柏葉向來係偏硬，但呢度啲黑柏葉硬到啲尖位吉口，仲咬好耐好似𡁻膠咁…流沙墨魚丸係唔流沙嘅，仲要超細粒。其他嘢都過得去嘅，只係普普通通冇特別，同埋份量算少，唯一抵讚係粒鮮蝦雲吞好好味。
但終究重點係一行五人埋單每人近乎 $400，即刻覺得勁唔抵。同樣價錢過隔離街平時幫襯開間火鍋店，可以食埋龍蝦、鮑魚、活魚刺身、牛肉刺身、沙白/刀貝等等嚕，仲新裝修坐得舒舒服服…我搵唔到要黎呢度幫襯嘅理由…
Search